Aktivitäten - Mundart - Jahresberichte - Jahresbericht 2015

Jahresrückblick 2015

Dat nö-e Johr hammer am 22.01.2015 met dree mol Ratinger Jonges bejrüßt. Et Bier betahlden onsere Jong Ludwig Blumenkamp de jester 90Johr old jewo-ede wor. Dor Friedel hät öm met e lang Jedescht en Monkart jratuliert on je-ehrt. On he kräsch och noch en leckere Fläsch Sekt. Als Jäst wore do: Onse Baas Georg Hoberg, do Turmbaas Karl Heinz Dahmen, Volkmar Schrimpf on Heiner Blumenkamp de Jong vom Ludwig.
Friedel hät dem Baas noch tom Geburtstag gratuliert on en Fläsch Sekt geschenkt, de Georg hät sesch bedankt und will im Februar eene uutjeewe.
Dann hammer ons all opjestellt, domet dor Volkmar e Foto för et Monkartbuek maake konnt.
Als nächstes hammer de Termine bespro-eke:
Ratinger Kulturtag 2015, Stadttheater Ratingen am22.12. 2015 von 15:30 Uhr bis 16:00 Uhr.
Monkartowend am 04.03. 2015 um 19:30 Uhr im Homberger Treff
Em Herbst ne Monkartowend im Spiegelsaal, de Termin steht noch nitt fest.
Dor Ludwig hät dann et Büfee free jejeewe. Ob eemol hüre mer butte trommele on tröte. Do spellden dor Suibertus Spellmannszoch uut Di-epebru-ek onge för em Tu-en. Dor Baas hadden de bestellt, weil dor Ludwig de met jejründet hadden. De Jonges ko-eme dann all de Trapp eropp on dor Ludwig hadden de Träne en de Oure. Et wu-ed noch ne schü-ene Owend.

Am 17.02. 2015 hammer met dree mol Ratinger jonges dat 175. Treffe aanjefange. Friedel bedankden sesch bem Baas Georg Hoberg för dat Brauhuusbier on dat Büfee wat he noch nohdräschlesch ob sinne Jebortsdaach spendiert hadden.
En draurije meldong am Aanfang: Dor Helmut on dor Raimund Pfeiffer wolle ende Määz uut jesonkheetlische on Aldersgründ em Monkartkries obhüre. Schad!
De Ratinger Kulturdaach am 22.02.2015 make 6 Mann von uns, on dor Ewald Dietz uut Lenkdörp met. Dor Friedel hät de Leitung.
Am 04.03. 2015 es em Homberjer Treff ne Monkartowend. 10 Jonges wolle metmaake. Dor Friedel hät schon de Texte zom vördraare vordeelt.
Jürgen Bocksteegers hät e nö-i Döneke vörjedraare: „Et Aalangele“  Prima Jürgen!
Donoh fing de lostije Deel mem Baas sinn Jebortsdaachsfier an. Et wor widder mol ne schü-ene Owend.

Am 17.03. 2015 hammer met dree mol Ratinger Jonges dat 176. Treffe aanjefange. Dat Bier betahlden dor Friedel ob sinne Jeborsdaach. Am 23.03. 2015 kömmt dat nö-e Monkartbu-ek eruut, wat dor Monkaertkries jestaltet hät. Jeder krett e Bu-ek ömsöns on fönef stöck mot jeder för 9.- Euro an dor Mann brenge. Dor Friedel vordeelt de Bü-eker bem jemensame E-ete met ons Wiewer em Ratinger Brauhuus.
De Monkartowend em Homberjer Treff wor ju-et aanjekomme. De nächste Termin wu-ed schon von  de Frau Komossa aanjefrocht.
De Termin för ne Monkartowend em Spiejelsaal steht fass. De es am 16.10. 2015 öm 19 Uhr.
Dor Friedel mackten de Vörschlach, em Su-emer kottfrestisch ne Wanderdach met onser Wiewer met ne Enkehrschwung am Eng öm jemensam lecker to E-ete. Vörschläsch wü-eden aanjeno-eme.
Jügen Bockstegers hat e nö-i Döneke jeschri-ewe: „De Weihrauch“. Dat Aalangele hammer korrejiert. Friedel hät 6 Dönekes vörjele-ese. Twe dovon hammer korrejiert: „De falsche Jeroch“ on „Frescheet siescht“ Donoh wor Fierowend.

Am 14.04. 2015 wor dat 177. Treffe. Öm 17 Uhr hammer aanjefange. Hans Nettler hadden Jeburtsdaach on betalden et Bier. Dat eschte Jeld vom Bü-ekervorkoop kom renn.
501 Johr Dicke Turm. Paar Jonges hant sesch jemeldet öm em Dicke Turm vör de Beseschtjungsjäst paar Vördräsch op Ratinger Platt to maake
Dor Friedel hadden för jedem ne Zeddel jemaat met nüng Rehe en hurdütsche Schreft. Dat solden de Jonges en Monkart öwwersette. Dat Erjeffniss wor janz schlemm. De Hälfte wor nit en de Laare all de Wö-et to öwersätze.
Dor Jürgen hadden e nö-i Döneke jeschri-ewe: „De We-ihrauch“
Dann hammer noch vom Friedel „De Vordonkelong“ korrejiert.

De 178. Tosaamekonft wor am 19.05.2015 Gerd Artz hät för em  Friedel die Leitung em Spejelsaal  öwwernohme on hät em Christian offizi-ell ob dor Jebortsdaach jratuliert. Die kleene Wanderong met ons Fraue en Eggisch es am 07.06.2015. Am 04.06. röppt dor Friedel aan ob et we-edermäßisch passt.

Friedel hadden widder vordeckte Bläder jeschri-ewe zom Öwwersetze. Gerd menden dösmol wör dat Erjebnis besser jewe-ese.
Inzwesche wor dor Friedel enjetroffe on mer hant dann noch een Sitt von:„De Jongestour noh England“ korregiert. Öm 19:30 Uhr wor Schluß. Die Stell för et nächste Treffe wü-ed noch bekannt jejeewe.

Am 16.06.2015 wor dat 179. Treffe widder em Dicke Turm. Dat Knie vom Friedel wu-ed langsam besser. Friedel hät sesch bem Werner Kall för dat Jebortsdachsbier bedankt on op öm aanjestu-ete. Dor Helmut Pfeiffer hadden uut Spanie aanjeru-epe on löt all schü-en jrü-eße. Friedel bedankten sesch be all, die en Eggisch die kleen Wanderung, de kleene Fröhschobbe on dat dicke Meddache-ete metjemaat hant.
E Dankeschü-en an de Metjlieder, dat jeder de Flischtandeel von de Monkartbü-eker vorkoppt hät. 70 Bü-eker för 630,00 €
Friedel hät 2 nö-e Dönekes jeschri-ewe on vörjeleese: „Hallehankball em Ongerhemp“ on „De Jiffelprum von de Homberjerstroot.“ Bem nächste Treffe dommer se korrejiere. Dann hammer vom Jürgen Bocksteegers dat Döneke „De Wehrouch“ korrejiert.
De letzte 4 Sidde non „De Jongestour noh England“ vom Friedel wu-eden och noch korrejiert.
Peter Koch meiden de Vörschlach de Zahle uuttoschriewe, domet se reschtisch uutjespro-eke weede.
Dann ko-em noch ne ju-ede Vörschlach: Lange Vördräsch met twe oder dree Mann vörtodraare, domet emmer noh een Sitt, de nächste draan es. Dann es dat för eene Jong nit to völl, on för de Lütt och interessanter.

Öm 17 Uhr  hammer am 21.07.2015 dat 180. Treffe aanjefange. Friedel hät sesch bem Klemens bedankt, weil he de Arbitt vom Jürgen, de Motter vom Monkartkries, öwernohme hadden. Dat Bier ko-em vom Gerd Artz, de em Mai schon Jebortsdaach hadden.
Mer dorfte mer bes 18:45 Uhr em Turm, weil do noh noch en Besischtijung wor. De Führong sollden dor Christian maake, weil dor Jürgen nit do wor. De woßt awwer nix von sin Ehre. Dann jing dat Telefoniere los. En Turmbeschriewung stüng em Internet. De PC em Turm jeht mer öwer e Passwo-et op. Wer kennt dat Passwo-et? Widder telefoniere. Dann klappten et. Dor Christian wor beschäftischt.
Peter Koch stellden en Fläsch Likör uut Holland ob dor Dösch, met Koffe-in drenn, domet mer all wach we-ede. Alkoholjehalt 14%. Danke Peter.
Dann hammer en nüngtesch Johr old Jedescht öwwersetz. Dor Doktor Baumann wollt wesse, wie sesch dat Platt en dör Tiet vorängert hät. De Artikel kütt en de Quecke.
Friedel hat widder ne Text en Hurdütsch jeschri-ewe de widder öwersett weede sold. Dat Erjebnis   wü-ed langsam besser.
Dann hammer vom Friedel dat Döneke „Hallehankball em Ongerhemp“ korregiert.
Donoh wu-ed et Tiet zom Schluß maake.

De 181. Tosaamekonft wor am 18.08.2015 öm 17 Uhr em Dicke Turm on mer hant et met dree mol Ratinger Jonges aanjefange. E nö-i Jesescht am Dösch, Heribert Heinz well sech paarmol de Kries aankieke on dann entscheide ob he janz metmaake well.
Kott drop kütt onse Baas Georg Hoberg erenn on wü-ed hezzlisch bejrüßt.
De Monkartowend em Ratinger Brauhuus kann am 16.10. nit stattfenge weil de CDU et sibbteschjöhrije Jubiläum fiert, dor Bundesdaachspräsident en Rede hält, on twe Paarteijenosse von ons do hin mösse. Dodorsch fehle ons sees Projrammpunkte. Dat jeht nit! Dat hät Friedel esch am Mondach  erfahre. Dor Jürjen hät em Brauhuus mer noch för dor 09.10.2015 ne Termin vörm Spiejelsaal jekräje. Leider könne beide Baase an dem Daach och nit. Dor Klemens kömmert sesch öm de Jongeskapell, Christian Schneider besorscht de Li-ederheftkes. Dat Projramm wü-ed nö-i jeschri-ewe. Lange Dönekes weede met dree Mann vörjedraare.
Mer hant noch dree Dönekes korrejiert:
„De Jiffelprum von de Hombergerstroot“  vom Friedel Bonn
„Onser Baggerlö-eker“       vom Friedel Bonn
„Ne Dach, de esch nit vohjeete kann“        vom Gerd Artz

Am 16.09.2015 hammer dat 182. Treffe jemaat. Met dree mol Ratinger Jonges hammer öm 17 Uhr aanjefange. Friedel hät met e paar nette Wö-et onsere leider vorstorwene Ludwig Blumenkamp bedeit. Donoh hammer met en stelle Jedenkminütt an öm jedeit.
Dor Monkaertkries spendet als letzte Wonsch vom Ludwig, 50 € an de Ratinger Jonges.
Heribert Heinz wor och widder do. Als janz nö-i Jesescht ko-em dor Achim Egenberger de Trapp errop. Dor Gerd Artz hadden öm enjelade.
Onse Baas joof ons dann och de Ehre. Prima Baas maak dat ruhisch döckeser.
Dann vortellden dor Friedel wat die twe Parteijenosse von de CDU dorsch de Terminvorschiebong alles enjbrokt hant. Dor Baas kann nit, dor Vizebaas kann och nit, dor David Woods uut England kann och nit (hät twe Orjelkonzerte), dor Friedhelm Conrad es in Kur. Dat Projramm moßt ömjeschri-ewe weede. Dann seit dor Hans Nettler noch aff (jesonkheetlische Jründ), Gerd Artz sprong Jott se Dank för em en. Dor Turmbaas Karl Heinz Dahmen sprengt för öm Baas en, och met ne Projrammpunkt.
Dann ko-em de Jeneralprob. Koom eener hadden jeübt. Dor Friedel hätt de Denstach för dem Friedach als nöe Jeneralprob fassjesatt.

Dat 183. Treffe am20.10. 2015 hammer met dree mol Ratinger Jonges aanjefange. Friedhelm Conrad, danke för et Bier.
Am Dösch so-et e nö-i Jesescht: Hans Willi Baumgarten. He es Ratinger Jong, em Ratinger Oste  jru-et jewo-ede, kallt on schrift prima Ratinger Platt. He hadden och schon e paar Dönekes metjebreit. He well be ons metmaake.
Toi-esch hammer ne Röckbleck op onse Monkartowend jehalde. All wore em Jru-ete on Janze tofrie-ede. Friedel hät sesch noch ens be all denne die metjemaat hant bedankt on och de Musiker von de Jongeskapell on de Technicker jelobt. Dat Echo vom Publikum wor mer positiv. Dor Chrisian hätt sesch em No-eme vom Monkartkreis för de schü-ene Owend on de janze Arbitt bem Friedel bedankt.
Dor Gerd Artz hadden en Jeschescht en Monkart jeschi-ewe:„Kaiser Karl de Jru-ete on ons Angerland“
Jeder hadden de Text vörlieje on moßten twe oder dree Sätz vörlese. Die hammer dann ob Schrief-fehler ongersöckt on manschmol och e beske ömjemodelt. Am Eng wor et su, wie mer et för reschtiesch fonge.
Dor Friedel hadden paar Texte ob Hu-erdütsch jeschi-ewe, op de Röcksitt de selbe Text op Platt. De Blä-eder to jefaldet on to jeheftet. De Text met de Ratinger Monkart wor nit mie to senn. No moßten jeder onger de hurdütsche Text ob sin Art onge dronger de Text ob Platt schriewe. Am Schluß hammer vorjlesche wat jeder jeschri-ewe hadden. Et wor schon ongerschiedlesch.
Am Schluß hätt dor Hans Willi Baumgarten sin Dönekes vörjele-ese. De Meeste met e Thema he uut de Jejend on uut sin Kengertiet. Dat tohüre hät ons völl Spaß jemaat.

184. Tosaamekonft am 17.11. 2015. Öm dree nor fönef hätt dor Friedel met dree mol „Ratinger Jonges“ dat Treffe aanjefange. Dat Bier betahlden Willi Nüsser. Prost Willi, op die Wohl on Danke.
Dor Willi Nüsser on dor Klemens Michels hadden Jebortsdaach jehatt on dor Friedel hätt em Nome von de Jonges hezzlesch jratuliert.
Friedel hät e paar Termine bekannt jejeewe:
Am 1. Dez. 2015 wü-ed em Ratinger Hematmuseum öm 18 Uhr de nö-e Uutjaaf von de Quecke vörjestellt.
Ne Emfehlong von onse Baas: Em Trimbornsaal es e hurklassisch Trimborn-Priesdräjerkonzeet.
Dat es am Sondaach de 22. November öm 11 Uhr.
Onse jru-ete Monkartowend em Spiejelsaal vom Ratinger Brauhuus es am 14. Oktober 2016 on fängt öm 19 Uhr aan.
De Ratinger Kuturtag ist am 14.02.2016. Nach Absprache mit Manfred Buer maake  mer om Ratinger Kulturtag nit met. Dat Intresse von de Tohürer es nit do.
Mer hant noch twe Dönekes vom Hans Willi Baumgarten korrejiert: „Schellemännekes“ on „En Fahrt noh Paris“

185. Treffe am 15.12. 2015. Öm dree nor fönef hätt dor Friedel met dree mol „Ratinger Jonges“ dat Treffe aanjefange. Extra bejrü-eßt wurden dor Baas Georg Hoberg, Vicebaas Leo Schleich on dor Turmbaas Karl Heinz Dahmen. Leo wor 75 Johr jewo-ede on kräsch en Fläsch Ratinger Sekt.
De Motter von de Kompanie, dor Jürgen Bocksteegers, kräsch och en Fläsch Ratinger Sekt för sinn Arbitt, die he dat janze Johr öwwer jemaat hätt; kassiere, Bier besorje, för en jröttere Fier dat Büffet orjanisiere usw. Friedel bedangden sesch be all denne, die metjeholpe hant dat alle Voranstaltong schü-en jeklappt hant.  Friedel hät dann ne kleene Röckbleck jehalde vom vorjangene Johr. Mor mot sesch wundere, wat do alles tosaame ko-em. Twe nö-e Metjlieder sind och dobe-i jekomme, dor Achim Egenberger on dor Hans Willi Baumgarten. Dat weschtischste es äwwer, dat mer kenne Zank on Striet en de Mannschaft hadde, do sind ons Frollütt met enbejriffe. De Tosaamearbitt mem Vörstand wor och prima. Dat soll och all so bliewe.
Dann wu-ed dat Büffe free jejeewe on de Affschlußfier vom Johr konnt los jon.

Friedel Bonn